بەشداربووانی کۆرسی "خوێندنەوەی هێڵکاری دڵ" لە کۆیە بڕوانامەیان پێبەخشرا

کۆمەڵەی خوێندکارانی کوردستان بۆ خزمەتکردنی خوێندکارانی قەزای کۆیە، کۆرسێکی زانستی "خوێندنەوەی هێڵکاری دڵ "(ECG) بۆ خوێندکارانی ئەو سنوورە کردەوە و دوای چەندین ڕۆژ لە وانە وتنەوە، کۆرسەکە بە سەرکەوتوویی کۆتاییهات.

بەئامانجی بەرزکردنەوەی ئاستی زانستی و کرداریی خوێندکاران، کۆمەڵەی خوێندکارانی کوردستان - بازنەی پارێزگای هەولێر کۆرسی ڕاهێنانی "ئەنجامدان و خوێندنەوەی هێڵکاری دڵ" (ECG)، لە قەزای کۆیە بەسەرکەوتوویی بەڕێوەبرد.

کۆرسەکە بۆ ماوەی سێ ڕۆژ لە نەخۆشخانەی شەهید د.خالید بەردەوام بوو، کە ڕۆژانە چوار کاتژمێر ڕاهێنانی تیۆری و پراکتیکی بەخشی بە بەشداربووان، وانەکانی کۆرسەکە لەلایەن (د.کاروان باوەدین کەریم) بەناونیشانی پزیشکی پسپۆڕی نەخۆشییەکانی هەناوی و دڵ، بە شێوازێکی هاوچەرخ و زانستی وترانەوە.

تەوەرە سەرەکییەکانی کۆرسەکە بریتی بوون لە:
• تێگەیشتنی سەرەتایی: ناساندنی بنەماکانی هێڵکاری دڵ (ECG) و چۆنیەتی کارکردنی ئامێرەکە.
• ڕاهێنانی پراکتیکی: فێربوونی چۆنیەتی ئەنجامدان و بەستنی ئامێرەکە بە شێوازێکی دروست.
• شیكردنەوە و دەستنیشانکردن: ڕاهێنان لەسەر خوێندنەوەی نەخۆشییەکان و بارودۆخە فریاگوزارییەکان بەپێی هێڵکاری دڵ.

لە کۆرسەکەدا زیاتر لە ٨٠ خوێندکاری بەشە جیاوازەکانی پزیشکی بەشداربوون و سوودمەندبوون لە زانیارییە پراکتیکییەکان، بەو هۆیەوە کۆرسەکە یارمەتیدەرێکی بەهێز دەبێت بۆ ئاییندەی پیشەییان لە کایە جیاوازەکانی تەندروستیدا.

لە دوای کۆتاییهاتنی کۆرسەکە بڕوانامە بەسەر خوێندکارە بەشداربووەکاندا دابەشکرا و دەستخۆشی لە ڕێکخەران و مامۆستای کۆرسەکە کرا، لەپای سەرخستنی ئەم خولە زانستییە گرنگە.

کۆمەڵەی خوێندکارانی کوردستان دووپاتی دەکاتەوە کە بەردەوام دەبێت لە خزمەتکردنی خوێندکاران و ڕەخساندنی دەرفەتی ڕاهێنان و فێربوون لە سەرجەم شار و شارۆچکەکان بۆیان.