"ئاییندەی خوێندکاران لەنێوان کارامەیی و بڕوانامەدا"

لە چوارچێوەی پڕۆژەی "هاوینی ئەکادیمی خوێندکاران” مێزگردێک لەژێر ناونیشانی ئاییندەی خوێندکاران لەنێوان کارامەیی و بڕوانامەدا، بەڕێوەچوو، زۆرێک لە خوێندکارانی دەڤەری ڕاپەڕین بەشدارییان تێدا کرد.

مێزگردەکە لە کەمپەسی پشدەر بەسەرکەوتوویی ئەنجامدرا و مامۆستا (هیوا عەلی) نووسەر و توێژەری بواری پەروەردە وانەکانی پێشکەشکرد.

لە ناوەڕۆکەکەیدا تیشک خرایە سەر گۆڕانکارییە خێرا و بەردەوامەکانی بازاڕی کاری سەردەم و ئەو پێداویستییە نوێیانەی لە بواری پیشەیی و ئەکادیمییەکاندا دروست دەبن، جەخت لەوەشکرایەوە کە داهاتووی خوێندکار تەنها بە بڕوانامەی ئەکادیمی دیاری ناکرێت، بەڵکو (کارامەیی، شارەزایی، توانای جێبەجێکردن و تواناکانی گونجاندن لەگەڵ گۆڕانکارییەکانی بازاڕی کار) ڕۆڵی بنەڕەتی لە داهاتووی پیشەییدا دەبینن.

لەلایەکی دیکەوە چەندین ڕێوشوێنی ئەکادیمی و هاوچەرخ خرانەڕوو بۆ ئەوەی خوێندکار بتوانێت لە ماوەی خوێندندا و لەگەڵ بەدەستهێنانی بڕوانامەدا بەشێوەیەکی وشیارانە تواناکانی پەرە پێبدات و خۆی بۆ پێداویستییەکانی بازاڕی کاری داهاتوو ئامادە بکات.