وەزارەتی پەروەردە پێشنیاری بەخشینی پێنج نمرەی بە سەرجەم خوێندکارانی پۆلی دوازدە پەسەند کرد

وەزارەتی پەروەردەی حکومەتی هەرێمی کوردستان، پێشنیاری لیژنەی باڵای تاقیکردنەوە گشتییەکانی پەسەند کرد سەبارەت بە بەخشینی (٥) پێنج نمرەی بڕیار بە سەرجەم خوێندکارانی پۆلی دوازدەی ئامادەیی.

بڕیارەكەی وەزارەتی پەروەردە دوای کۆبوونەوەیەکی تایبەت لەگەڵ نوێنەری خوێندکاران و لایەنە پەیوەندیدارەکان، لە ڕۆژی٢ی ئایاری ئەمساڵ هاتە کایەوە.

ڕەوەزی ئەحمەد شا، ئەندامی پەرلەمانی کوردستان لە فراکسیۆنی یەکێتیی نیشتمانیی کوردستان، لە پەیامێکی تایبەتدا وێڕای دەربڕینی خۆشحاڵی بە ئەنجامی کۆبوونەوەکە، رایگەیاند، ئەم هەنگاوە لەپێناو بەرژەوەندیی گشتی و کەمکردنەوەی فشارە دەروونییەکانی سەر خوێندکاران بووە لەم قۆناغە هەستیارەدا.

ناوبراو وتیشی: "سەركەوتنی خوێندكاران ئامانجی ئێمەیە و بە پەرۆشییەوە لەخزمەت داواكارییەكانیان دەبم".