سەرۆک کۆماری عێراق: لە ڕابردوودا بە شانازییەوە وەك ئەندامێكی كارای كۆمەڵەی خوێندكاران كارم كردووە

پەیامی بەڕێز نزار ئامێدی، سەرۆككۆماری عێراق
ئەندامان و كادرانی كۆمەڵەی خوێندكارانی كوردستان

لە یۆبیلی زێڕینی دامەزراندنی رێكخراوە تێكۆشەرەكەتان، پیرۆزبایی گەرم ئاڕاستەی ئێوە و تەواوی خوێندكارانی كوردستان و عێراق دەكەم.

كۆمەڵەی خوێندكارانی كوردستان لەمێژووی 50 ساڵەی پڕسەروەری خۆیدا، سەرمەشقی فیداكاری و قوربانیدان بووە، بەدوانەی چەك و قەڵەم خەباتی نەتەوەیی و پیشەیی جۆشداوە، لەم كاروانە پڕشانازییەی خۆیدا دەیان سەركردە و كادری بۆ سەربەخۆیی و ئازادی كردووەتە قوربانیی.

لەنیو سەدەی خەباتی پیشەیی و مەدەنی خۆیدا، كۆمەڵەی خوێندكارانی كوردستان فێرگەی پێگەیاندنی كادر و سەركردەی بەتوانا و لێهاتوو بووە، كە لەناوەندەكانی بڕیار و یاساداناندا جێگە و پێگەی دیارییان هەیە، هەروەك ڕۆڵی گەورەی بینیوە لە گەشەپێدانی تواناكانی خوێندكاران و دیموكراتیزەكردنی ناوەندەكانی خوێندن و هێنانەكایەی بیری سەردەمیانە و هاوچەرخ.

لەسەردەمی ئەمڕۆماندا، دیدی نوێ‌ بۆ خەباتی مەدەنی و ڕێكخراوەییی هاتووەتە پێشەوە، هیوادارین ئێوەش بە پرۆژە و دنیابینی نوێوە هاوشان لەگەڵ گۆڕانكارییەكاندا، شێلگیرانە خزمەت بە خوێندكاران و لاوان بكەن، هەروەك لە ڕێگەی دروستكردنی پەیوەندی و دۆستایەتی لەگەڵ ڕێكخراوە عێراقی و جیهانییەكاندا خەباتی خۆتان بەرەو پێشەوە ببەن.

لەكۆتاییدا هیوادارم یادی دامەزراندنی ڕێكخراوە تێكۆشەرەكەتان، فاكتەری خزمەتی زیاتر و گەشەپێدانی ڕیزەكانی خوێندكاران و هێنانەدی ئایندەیەكی گەش بێت بۆیان، بەندەش پشتیوان و پشتگیرتان دەبم، چونكە لە ڕابردوودا بە شانازییەوە وەك ئەندامێكی كارای كۆمەڵەی خوێندكاران كارم كردووە.

هەر شاد و سەركەوتووبن
براتان
نزار ئامێدی
سەرۆك كۆماری عێراق