دەڤەری ڕاپەڕین.. کۆبوونەوەی پەروەردە و کۆمەڵەی خوێندکاران

بۆ ئاگاداربوون لە ڕەوشی خوێندن و بەرەو پێشچوونی کارەکانی خوێندکاران، لە دەڤەری ڕاپەڕین هەریەکە لە کۆمەڵەی خوێندکارانی کوردستان و بەڕێوەبەرانی پەروەردەکانی دەڤەری ڕاپەڕین کۆبوونەوە.

لەو کۆبوونەوەیەدا هەریەکە لە بەڕێزان مامۆستا محەمەد کەریم بەڕێوەبەری گشتیی پەروەردەی ڕاپەڕین، مامۆستا مەحمود حسێن بەڕێوەبەری پەروەردەی پشدەر، مامۆستا ئومێد تۆفیق بەڕێوەبەری پەروەردەی ڕانیە و بەڕێوەبەرانی (١٣) ئامادەیی سنووری ڕاپەڕین، کۆبوونەوەیەکی هاوبەشیان لەگەڵ کۆمەڵەی خوێندکارانی کوردستان ئەنجامدا.

ئامانجی كۆبوونەوەکە گفتوگۆکردن بوو لەبارەی ستراتیژی پەرەپێدانی کار و چالاکییەکانی کۆمەڵەی خوێندکارانی کوردستان لە کەرتی پەروەردە و خوێدنگە ئامادەییەکانی سنووری بەڕێوەبەرایەتی گشتی پەروەردەی ڕاپەڕین، هاوکات بەرنامەی پێشنیارکراوی کۆمەڵەکە خرایە بەر دیدی ئامادەبووان و تەواوی پرۆگرامەکە تاووتوێ كرا.