خوێندکارەکەی کەرکوک بۆ خوێندنگەکەی گەڕایەوە

دوای ئەوەی مامۆستایەکی عەرەب لە خوێندنگەیەکی ناحکومی شاری کەرکوک لەسەر نەخشاندنی وێنەی ئاڵای کوردستان خوێندکارێكی کوردی دوورخستەوە، بەڵام دواجار هەڵایەکی گەورەی لەسەر دروستبو و خوێندنگەکە ناچارکرا خوێندکارە کوردەکە وەربگرێتەوە.

کۆمەڵەی خوێندکارانی کوردستانیش لەڕێگەی ڕاگەیاندراوێکەوە ئیدانەی ئەو کردە ڕەگەزپەرستانەیەی کرد و لەدژی بڕیاری خوێندنگەکە وەستایەوە، هەربۆیە دوای هەوڵە بەردەوامەکانیان، کێشەکە بەتەواوی چارەسەر کرا و خوێندکارەکەش گەڕایەوە بۆ ناوەندی خوێندنەکەی.

لەو سەروبەندەدا کۆمەڵەی خوێندکارانی کوردستان ڕایگەیاندووە کە لە هەوڵەکانیان بەردەوام دەبن بۆ پاراستنی شکۆی خوێندکار و پیرۆزییەکانی نیشتمان.

لەلایەکی دیکەوە کۆمەڵەی خوێندکاران سوپاسی هەوڵ و خەمخۆریی بەڕێز د.رێبوار تەها، پارێزگاری كەركوك دەکات بۆ بەدەنگەوەهاتن و چارەسەركردنی كێشەكە.