ڕاگەیەندراوێك لە كۆمەڵەی خوێندكارانی كوردستانەوە

لە یەکێک لە خوێندنگە ناحکومییەکانی کەرکوک خوێندکارێک لە وانەی هونەردا وێنەی ئاڵای کوردستانی نەخشاندووە، بەڵام مامۆستاکەی لە کاردانەوەیەکی ڕەگەزپەرستانەدا ڕێکاری لە بەرانبەردا گرتووەتەبەر و لە خوێندنگە دەریانکردووە، کۆمەڵەی خوێندکارانی کوردستانیش بەتوندی لە دژی بڕیاری ئەو خوێندنگایە وەستایەوە و ڕاگەیاندراوێکی لەو بارەیەوە بڵاوکردەوە.

دەقی ڕاگەیاندراوەکە:
بە توندی سەرکۆنەی بڕیاری دەرکردنی خوێندکارە کوردەکەی کەرکوک دەکەین، کە تەنها لەبەر نەخشکردنی (ئاڵای کوردستان) ڕووبەڕووی ئەم سزایە بووەتەوە، ئەم هەنگاوە نەک هەر پێشێلکردنی مافە سەرەتاییەکانی مرۆڤ و ئازادی ڕادەربڕینە، بەڵکو بێڕێزیکردنە بە شكۆ و سیمبوولی كورد و بەهەموو شێوەیەك دژی دەوەستینەوە.

كۆمەڵەی خوێندكارانی كوردستان لەگەڵ لایەنە پەیوەندیدارەكانی کەرکوک لەسەر هێڵە و داوا لەو لیژنەیە دەكات كە پێكهێنراوە، جگە لە هەڵوەشاندنەوەی بڕیارە شەرمهێنەكە، بە توندی سزای ئەو كەسانە بدرێت كە بڕیاری لەو شێوەیەیان داوە و دڵنیایی بدرێت كە ڕووداوی لەو شێوەیە دووبارە نەبێتەوە.