بانگەوازی نیشتمانی.. کەمپینی کۆکردنەوەی هاوکاریمان بۆ ڕۆژئاڤا ڕاگەیاند

لەژێر چاودێری وەزیری خوێندنی باڵا و توێژینەوەی زانستی و بەسەرپەرشتی (د.کۆسار محەمەد عەلی) سەرۆکی زانکۆی سلێمانی و (پ.د.هۆشیار عەبدوڵڵا عەزیز) سەرۆکی زانکۆی پۆلیتەکنیکی سلێمانی، کۆمەڵەی خوێندکارانی کوردستان و کەناڵ 8، کەمپینێکی گەورە بۆ کۆکردنەوەی هاوکاری بۆ کوردانی ڕۆژئاڤا ڕادەگەیەنن.

کۆمەڵەی خوێندکارانی کوردستان بەردەوامە لە هەوڵە نیشتمانیی و نەتەوەییەکانی، هەربۆیە بۆ کوردانی ڕۆژئاڤا لە هەوڵێکی گەورەدایە تاوەکو زۆرترین بڕی هاوکاریان بە هاوبەشی لەگەڵ کەناڵ 8 بۆ کۆبکاتەوە، بەو بۆنەیەوە بانگەوازێکی گەورەی نیشتمانیی لە ناوەندە ئەکادیمییەکانی کوردستانەوە ڕاگەیاندووە و هەڵمەتەکەیان دەستپێکردووە.

چەند ڕۆژێکە لە سەرجەم شار و شارۆچکەکانی هەرێمی کوردستان کەمپین و کۆکردنەوەی هاوکاری بۆ کوردانی سەرجەم شارەکانی ڕۆژئاڤا بەردەوامی هەیە، جگەلەوەش چەندین چالاکی و خۆپیشاندانی گەورە لەلایەن ڕەوەندی کوردییەوە لە تاراوگە ڕێکخراوە و پاڵپشتی ئەو هەڵمەتە گەورەیەن کە بۆ کوردانی ڕۆژئاڤا ئەنجام دەدرێت.

هەموو ئەوانەی هەنگاوانەی دەنرێن بۆ وەستاندن و کپکردنەوەی ئەو هاوکێشە ناڕەوایەیە کە لە دژی بەڕێوەبەرایەتی خۆسەر لە ڕۆژئاڤای کوردستان و هێزە کوردییەکان ئەنجام دەدرێن، ئەوەش لەپێناو سەلامەتی گیانی کوردان و هێشتنەوەی زیندووێتی شوناسەکەمانە بەڕووی جیهاندا، لەو نێوانەشدا کۆمەڵەی خوێندکارانی کوردستان لە هەوڵەکانی بەردەوامە و ئەوەی لە توانایدا بێت دەیکات.