ئاران غەفور: سلێمانی وەرچەرخانێکی گرنگی بەخۆیەوە بینی لە مێژووی کاروانی زانستی و داهێنانی خوێندکاراندا

بەبۆنەی سەرکەوتنی یەکێک لە گرنگترین و گەورەترین ئیڤێنتەکانی سلێمانی بۆ خوێندکاران، ئاران غەفور ئەحمەد، نوێنەری سەرۆکی یەکێتیی نیشتمانیی کوردستان بۆ کاروباری خوێندکاران، پەیامێکی ئاڕاستەی هەموو ئەو خوێندکارانە کرد کە حەز و خولیایان بۆ زانست و پێشکەوتن هەیە و پاڵپشت و پشتگیریی کۆمەڵەی خوێندکارانی کوردستانی بۆ دووپات کردنەوە.

خوێندکارانی خۆشەویست..
داهێنەران و گەنجانی وڵات..
ئەمڕۆ شاری سلێمانی وەرچەرخانێکی گرنگی بەخۆیەوە بینی لە مێژووی کاروانی زانستی و داهێنانی خوێندکاراندا. ئیڤێنتی (داهێنەرانی ئایندە) سەلمێنەری ئەو ڕاستییە بوو کە هەر کاتێک ژینگەیەکی لەبار بۆ خوێندکاری کورد بڕەخسێنرێت، تواناکانیان دەدرەوشێنەوە و هاوشانی پێشکەوتنە جیهانییەکان هەنگاو دەنێن.

ئێمە لە کۆمەڵەی خوێندکارانی کوردستان، بڕوای تەواومان بە وزەی داهێنەرانەی ئێوە هەیە، ڕێکخستنی ئەم ئیڤێنتە بە هاوبەشی لەگەڵ زانکۆی پۆلیتەکنیکی سلێمانی و زانکۆی جیهان-سلێمانی، هەوڵێکە بۆ ئەوەی لێهاتووییە زانستییەکانتان تەنها لە چوارچێوەی تیۆریدا نەمێننەوە، بەڵکو ببنە بزوێنەری ئاوەدانکردنەوەی کوردستان.

پەیامی ئێمە ڕوونە: ئێمە لێرەین بۆ پێشوازیکردن لە هەر دەستپێشخەرییەک کە خەونی خوێندکاران بەرەو واقیع ببات، بەڵێن دەدەین هەمیشە پشتیوان و پارێزەری داهێنانەکانتان بین و دەرگامان بۆ هەر گەنجێک واڵایە کە بیەوێت لە ڕێگەی زانستەکەیەوە، شوێنپەنجەی لە گۆڕانکارییە ئەرێنییەکانی نیشتماندا دیار بێت.

ئاران غەفور ئەحمەد
نوێنەری سەرۆكی یەكێتیی نیشتمانیی كوردستان بۆ كاروباری خوێندكاران