کۆمەڵەی خوێندکاران تێچووی چالاکییەکانی ڕۆژی ئاڵا دەبەخشێتە چەمچەماڵ

بەهۆی کارەساتە سروشتییەکەی چەمچەماڵەوە، کۆمەڵەی خوێندکارانی کوردستان لە ڕوانگەی بەرپرسیارێتیی نیشتمانی و وەک هاوسۆزییەک بۆ خەڵکی خۆشەویستی ئەو شارە، بڕیاریدا بە ڕاگرتنی گەورەترین ڕێوڕەسمی ڕۆژی ئاڵای کوردستان.

ماوەی دوو مانگە کۆمەڵەی خوێندکارانی کوردستان ئامادەکاریی بۆ چەندین چالاکی هەمەڕەنگی جۆراوجۆر بۆ ڕۆژی ئاڵا دەکات، بەڵام وەک هاوسۆزییەک و هەستکردن بە بەرپرسیارێتی، هەموو ئەو چالاکییانە ڕادەگرێت و تێچووی ئەو یادە بۆ خەڵکی چەمچەماڵ و زیانلێکەوتووانی شارەکە تەرخان دەکات.

 کۆمەڵەی خوێندکاران بەمەبەستی پشتیوانی لە هاونیشتمانیان لە چەمچەماڵ بڕیاریدا تەواوی تێچووی چالاکییەکانی ڕۆژی ئاڵا ببەخشێتە یەكەی فریاكەوتنی خێرای مرۆیی کە بۆ قەرەبووکردنەوەی کارەساتەکەی چەمچەماڵ پێکهێنراوە.

لەلایەکی دیکەوە تەواوی هەوڵەکانی خۆیان چڕکردووەتەوە لەڕێگەی ئۆرگانە حزبی و حکومییەکانەوە تاوەکو بەزووترین کات هەموو ئەو ناوەندە زانستی و پەروەردەییانەی زیانیان بەرکەوتووە، بە باشترین شێوە نۆژەن بکرێنەوە و بەهەمووشێوەیەک هاوکاری هەنگاوەکانیان دەبن.

کۆمەڵەی خوێندکارانی کوردستان: "پیرۆزبێت ڕۆژی ئاڵای کوردستان و دڵمان لەگەڵ چەمچەماڵی خۆشەویستماندایە".