پەیامی کۆمەڵەی خوێندکاران بۆ کاندیدە سەرکەوتووەکانی پەرلەمانی عێراق

بەشداری و کاریگەریی خوێندكاران و گەنجانی كوردستان لە هەڵمەتی بانگەشەی هەڵبژاردن و دەنگدان بۆ ئەنجومەنی نوێنەرانی عێراق، سەلمێنەری رۆڵی گرنگ و بێسنووری ئەم چینە كاریگەرەی كۆمەڵگەیە لە داڕشتنی ئایندەی سیاسی و كۆمەڵایەتیی كوردستان و عێراق.

لەئێستاشدا ئەرکێکی گرنگ و مێژوویی دەکەوێتە ئەستۆی دەسەڵاتی جێبەجێکردن و نوێنەرە هەڵبژێردراوەکان بۆ ئەوەی لە داواکاری و خواستەکانیان تێبگەن، دەبێت داواکارییەکانی خوێندکاران وەك باشتركردنی كوالێتیی خوێندن و دابینكردنی خزمەتگوزارییەكان، كاری لەپێشینەیان بێت و ڕێزی لێبگیرێت، ئاشكرایە داهاتووی وڵات پەیوەستە بە لێهاتوویی و بیری داهێنەرانەی خوێندكاران و گەنجانەوە، بۆیە هەر هەوڵێك لەپێناو رەخساندنی ژینگەیەكی گونجاودا بێت بۆ ئەو چینە، مسۆگەركردنی داهاتوویەكی ڕوونە بۆ كۆمەڵگە و بەرەوپێشچوونی لە بوارە جیاوازەكاندا.

کۆمەڵەی خوێندکارانی کوردستان وەک دامەزراوەیەکی زانستی و پەروەردەیی و پارێزەری ماف و شایستەکانی خوێندکاران، بەڵێن دەدات بەردەوامبێت لە هاوکاری و پشتیوانیی بێسنوور بۆ هەر پرۆژە و هەنگاوێک کە خزمەت بە بەرژەوەندیی خوێندکاران و گەشەپێدانی رەوتی زانست و نوێگەری بکات لە هەرێمی کوردستاندا.

هەروەک داوا لە هەموولایەک دەکەین بەرپرسیارانە مامەڵە لەگەڵ بەڵێن و گوفتارەکانیان بکەن و هەوڵەکانیان بارتەقای ڕۆڵ و گرنگی ئەم چینە کاریگەرەی کۆمەڵگە بن و لەهیچ بارودۆخێکدا خواستەکانیان پشتگوێ نەخرێت.