پەیامی سەرۆکی یەکێتیی نیشتمانیی کوردستان بۆ زانکۆی سلێمانی

بەڕێز بافڵ جەلال تاڵەبانی، سەرۆکی یەکێتیی نیشتمانیی کوردستان پیرۆزبایی ئاڕاستەی زانكۆی سلێمانی کرد، بەبۆنەی بەدەستهێنانی پلەی یەكەم لەسەر ئاستی زانكۆكانی عێراق.

سەرۆکی یەکێتی لە پەیامەکەیدا دەڵێت "لە دڵەوە پیرۆزبایی لە بەڕێزان سەرۆک، مامۆستایان، فەرمانبەران و خوێندکارانی خۆشەویستی زانکۆی سلێمانی دەکەم بەبۆنەی بەدەستهێنانی پلەی یەكەم لەسەر ئاستی زانكۆكانی عێراق".

لە پەیامەکەیدا بافڵ تاڵەبانی سەرۆکی یەکێتیی نیشتمانیی کوردستان باس لەوەش دەکات ئەم دەستکەوتە گرنگە زانستییە کە بۆ جاری دووەمە زانکۆی دایک بەدەستی دەهێنێت، مایەی خۆشحاڵیی هەموو لایەکمانە و شانازییەکی دیکەیە بۆ سلێمانی.

لەکۆتاییدا سەرۆکی یەکێتیی دەڵێت "بەڵێنتان پێدەدەم وەک هەمیشە لەگەڵتانبم بۆ پێشخستنی زانکۆی سلێمانی، چونکە ئێوە بە ئاستە بەرزەکەتان سەری ئێمەتان بەرزکردووەتەوە".