کوردسات رێزلێنانی بەخشییە نوێنەری بافڵ جەلال تاڵەبانی بۆ کاروباری خوێندکاران

دەزگای میدیایی کوردسات رێزلێنانی بەخشییە ئاران غەفوور ئەحمەد، نوێنەری سەرۆک بافڵ جەلال تاڵەبانی بۆ کاروباری خوێندکاران، ڕێزلێنانەکەش لەپای هەوڵەکانیان بوو لە بوارەکانی کەرتی پەروەردە و خوێندنی باڵادا.

دێرین لەتیف رەشید، بەڕێوەبەری دەزگای میدیایی کوردسات پێشوازیی لە ئاران غەفوور ئەحمەد، نوێنەری سەرۆک بافڵ جەلال تاڵەبانی بۆ کاروباری خوێندکاران کرد و سوپاس و پێزانینی دەزگاکەی ئاڕاستە کرد لە بەرامبەر هەوڵەکانیان لەبوارەکانی کەرتی پەروەردە و خوێندنی باڵا.

لەبەرامبەردا نوێنەری سەرۆک بافڵ جەلال تاڵەبانی ئاماژەی بە ڕۆڵ و کاریگەریی دەزگای میدیایی کوردسات کرد کە هەمیشە میدیایەکی هاوسەنگ و پابەندبووە بە بەها باڵاکانی رۆژنامەوانی و کۆمەڵگە، جگەلەوەی بە ستانداردێکی بەرز و ناوەڕۆکێکی بەهێزەوە لەخزمەت بینەراندا بووە، هاوکات نموونەیەکی باڵا بووە بۆ میدیای نوێ لە ناوچەکەدا.

هەر لە دیدارەکەدا چەندین پرۆژەی هاوبەش لەنێوان کۆمەڵەی خوێندکارانی کوردستان و دەزگای میدیایی کوردسات گفتوگۆیان لەبارەوەکرا، بە ئامانجی خزمەتی خوێندکاران و بەرەوپێشچوونی رەوتی زانست لە هەرێمی کوردستاندا.