گرووپی (یەکسەر) براوەی پێشبڕکێ جیهانییەکەی ناسا بوون

دوای ئەوەی بۆ ماوەی دوو ڕۆژ 10 گرووپ لە خوێندکاران بەشداربوون لە پێشبڕکێیەکی جیهانی ناسا لە سلێمانی، یەکێک لەو گرووپانەی بەشدارییان تێدا کردبوو پلەی یەکەمی بەدەستهێنا و بوونە براوەی ئیڤێنتەکە.

هەریەکە لە (زانیار ئازاد ساڵح، سان سیروان عبداللە و میر عەبدولموتەڵیب یاسین) لە گرووپی (یەکسەر) براوەی پێشبڕکێکە بوون، ئامانجیان لە پڕۆژەکە بۆ پێشبینیکردنی کەشوهەوای هەموو ناوچەکانی جیهانە بەپێی داتای ساڵانی پێشووی ناسا، کە داتاکەشیان لەنێوان ساڵانی (2020 - 2024) وەرگرتووە.

گرووپی (یەکسەر) براوەی NASA International Space Apps Challenge - Sulaymaniyah  بوون، گرووپەکە چاڵێنجی (?Will It Rain On My Parade) هەڵبژاردبوو کە تایبەتە بە پێشبینی کەشوهەوا و سوودوەرگرتن لە داتاکانی ناسا لە چەند ساڵی رابردوودا.

گرووپی (یەکسەر) پرۆژەکەیان بەشێوەی وێب دروستکردووە و بە زمانەکانی (کوردی، عەرەبی و ئینگلیزی) کاردەکات، جگەلەوەش دەتوانێت لەگەڵ هەموو ئامێرە زیرەکەکاندا مامەڵە بکات و بەشێوەی ئاسان کەسی بەکاربەر سوودی لێوەربگرێت.

زمانە بەکارهاتووەکانیش بریتین لە:
Angular (tailwind) – Frontend
 NodeJS – Backend
 Python - Backend(data analysis)
 MySql – Database
 Cloudflare + VPS —> hosting

لەلایەکی دیکەوە بەشی سەرەکی بەکارهێنەر شوێنەکەی هەڵدەبژێرێت لەگەڵ بەروارێکدا کە چوار داتای پێشبینیکراو نیشان دەدات (ئەگەری باران بارین، تێکڕای پلەی گەرمی، خێرایی با و ڕادەی شێ)، بەو هۆیەوە بەکارهێنەر دوای سەردانکردنی شوێنەکان هەڵسەنگاندن دەنووسێت، کە دەتوانرێت بۆ داهاتوو وەک داتایەک وەربگیرێت تاوەکو باشتر پێشبینی کەشوهەوا بکەن .

کۆمەڵەی خوێندکارانی کوردستان میوانداریی ئەو پێشبڕکێیەی کرد کە ساڵانە ناسا ڕێکیدەخات و بۆ یەکەمجارە لە هەرێمی کوردستان ئەنجام دەدرێت، لەو پێشبڕکێیەشدا گرووپێک بە ناوی (یەکسەر) بوونە براوە و گرەوی هێزیان لەو ئاڵنگاریانەدا بردەوە.