بەشداربووانی کۆرسی "ژیریی دەستكرد لەپێناو سەركەوتنی ئەكادیمیدا" بڕوانامەیان وەرگرت

کۆمەڵەی خوێندکارانی کوردستان و زانکۆی ڕاپەڕین، کۆرسێکی زانستییان لەژێر ناونیشانی "ژیریی دەستکرد لەپێناو سەرکەوتنی ئەکادیمیدا" ئەنجامدا، دوای چەند ڕۆژێک لە وانە وتنەوە، بە سەرکەوتوویی کۆتاییهات.

ئەم کۆرسە بە هاوبەشی كۆمەڵەی خوێندكارانی كوردستان و سەنتەری گەشەپێدانی كار لە زانكۆی ڕاپەڕین كرایەوە، ئامانج لەو پرۆسەیە گەشەکردنی خوێندکاران بوو لە ڕەهەندی زانستی و ئاشنابوون بە هەموو بنەماکانی ژیریی دەستکرد و خۆگونجاندن لەگەڵ پێشکەوتنەکانی جیهاندا، بەو هۆیەوە زۆرێک لە خوێندکارانی ئەو دەڤەرە بەشدارییان تێداکرد و بڕوانامەیان وەرگرت.

لە ڕۆژی یەکەمی کۆرسەکەدا مامۆستا ئاکام عزیز، مامۆستای زانکۆ وانەیەکی تایبەتی لە چەند خاڵێکی گرنگدا بۆ بەشداربووان شی کردەوە کە پێکهاتبوون لە:
١- تێگەیشتن لە چەمکە بنەڕەتییەکانی ژیریی دەستکردی بنیاتنەر و ڕۆڵی لە بواری ئەکادیمیدا.
٢- باڵادەستی بەسەر هونەری "ئەندازیاریی پرسیار"دا بۆ بەدەستهێنانی ئەنجامی ورد و بەسوود لە مۆدێلەکانی ژیریی دەستکرددا.
٣- بەکارهێنانی ژیریی دەستکرد بۆ ئامادەکردنی وانە، کورتکردنەوەی بابەتە ئاڵۆزەکان و دروستکردنی ئامڕازەکانی کۆشش کردن.

لە ڕۆژی دووەمیشدا مامۆستا سەردار حسێن، مامۆستای زانکۆ بەشێکی دیکە لە وانەکانی لەئەستۆگرت و بریتی بوون لەو دوو خاڵەی لە خوارەوەدا ئاماژەمان پێکردوون.
١- ناسینەوە و هەڵبژاردنی ئامڕازە گونجاوەکانی ژیریی دەستکرد بۆ ئەرکە ئەکادیمییەکان.
٢- بەکارهێنانی ئامڕازەکانی ژیریی دەستکرد بۆ گەڵاڵەکردنی بیرۆکەکانی توێژینەوە، ئەنجامدانی Literature Review  و یارمەتیدان لە نووسینی ئەکادیمی.
٣- ناسینەوەی لایەنە ئەخلاقییەکان، سنووردارکراوەکان و لایەنگرییەکانی ژیریی دەستکرد.
٤- بەشێوەیەکی دروست سەرچاوەنووسین بۆ ناوەرۆکی دروستکراو لەلایەن ژیریی دەستکردەوە لە کارە ئەکادیمییەکاندا بۆ پاراستنی راستگۆیی ئەکادیمی.