نوێنەرانی کۆمەڵەی خوێندکاران بەشدارییان لە سیمیناری کلتور و زمان کرد

دوو نوێنەری کۆمەڵەی خوێندکاران بۆ بەشدارییکردن لە سیمیناری ئاڵوگۆڕی کلتوور و زمان لەنێوان وڵاتانی تازەپێگەیشتوو، بەشێوەیەکی فەرمی بانگهێشتی چین کران.

سیمینارەکە ماوەی 20 ڕۆژی خایاند و لە شاری نانچانگ بەڕێوەچوو، پێنج نوێنەری هەرێمی کوردستان هاوشان لەگەڵ نوێنەرانی بەشێک لە وڵاتانی ئاسیا و ئەفریقیا بەشداربوون کە دووانیان نوێنەری کۆمەڵەی خوێندکاران بوون، سیمینارەکەش تایبەت بوو بە ئاڵوگۆڕی کلتوور و زمان لەنێوان چین و وڵاتانی تازەپێگەیشتوودا.

هەریەکە لە ڕەنوو ئاری نوێنەری کۆمەڵەی خوێندکاران لە زانکۆی سلێمانی و کارا عومەر بەرپرسی هەماهەنگی کۆمەڵەی خوێندکاران، هاوشان لەگەڵ سێ کەسی دیکە نوێنەرایەتی هەرێمی کوردستانیان کرد و لەو سیمینارەدا بەشدارییان کرد، کە تێیدا خاڵە هاوبەشەکانی نێوان کوردستان و شارستانیەتی چین تاووتوێ کران.

ڕێکخەرانی سیمینارەکە لە چین، 21 وڵاتی ئاسیا و ئەفریقیایان بانگهێتشکرد و یەکێک لەوانەش هەرێمی کوردستان بوو کە وەک نەتەوەیەکی گرنگ و بەرچاو ئامادەییان هەبوو، بەو هۆیەوە لەڕێگەی وتار و چەندین ڕەهەندی جیاوازەوە بابەتە گرنگەکان و کلتووری نێوان کوردستان و چین گەنگەشە کران.

 لەگەڵ دەستپێکی سیمینارەکە، نوێنەرەکەی کۆمەڵەی خوێندکارانی کوردستان لە وتارێکدا سوپاسی دەستپێشخەریی وڵاتی چینی کرد بۆ ڕێکخستنی سیمینارێکی وەها پێشکەوتوو، کە هەنگاوێکی گرنگ دەبێت بۆ زیاتر لێکنزیکبوونەوە و لێکتێگەیشتنی نێوان وڵاتان و نەتەوە جیاوازەکان.

لە بەشێکی دیکەی وتارەکەی کۆمەڵەی خوێندکارانی کوردستان، ئاماژە بەوە کرا ئەم جۆرە بەرنامانە دەبنە هەوێنی بەرەوپێشچوونی زیاتری کلتووری سیاسی و ئابووری نێوان نەتەوە جیاوازەکان.

لە کۆتاییشدا نوێنەرانی کۆمەڵەی خوێندکارانی کوردستان، خەڵاتی تایبەتیان بەخشییە سەرۆکی زانکۆی نانچانگ و بەڕێوەبەری سیمینارەکە.