دیالۆگ و خوێندنەوەی کتێب بابەتە گرنگەکانی زنجیرەی ڕۆشنبیری هەولێر بوون

کۆمەڵەی خوێندکارانی کوردستان زنجیرەی ڕۆشنبیری لە هەولێر ئەنجامدا و چەندین خوێندکاری کچ و کوڕ بۆ بەرەو پێشبردنی تواناکانیان بەشداربوون، لەو نێوانەدا دیالۆگ و سەرنجی ئامادەبووان بابەتی سەرەکی زنجیرەکە بوو.

کۆمەڵەی خوێندکارانی کوردستان لە هەولێر، کەشێکی زانستی بۆ نزیکەی 50 خوێندکار ڕەخساند و لەژێر چەتری زنجیرەی ڕۆشنبیریدا، دیالۆگ و گفتوگۆی بەشداربووان بوونە بابەتی گرنگی پەیوەست بەو زنجیرە ڕۆشنبیرییە، هەر خوێندکارێک و لە دیدی خۆیەوە شیکردنەوەی بۆ بابەتەکان کرد.

بەشێک لە بەڕێوەچوونەکانی زنجیرەی رۆشنبیری تایبەت بوو بە دیالۆگ، تێیدا گفتوگۆی چڕ لەسەر گەشەپێدانی خوێندکار ئەنجامدرا، لەو بارەیەوە شیکردنەوە و تیشک خستنە سەر توانای کەسی، ڕێگاکانی گەشەکردنی مرۆڤ و چۆنیەتی سەرکەوتنی، بوونە باسوخواسی خوێندکارە بەشداربووەکان.

 لە بەشێکی دیکەی زنجیرەی ڕۆشنبیری خوێندکارانی هەولێر، زیندووکردنەوە و پەرەپێدانی کلتووری کتێب خوێندنەوە بوونە ڕەگەزێکی گرنگی بەڕێوەچوونەکە و بەشێوەی گرووپ پرۆسەی خوێندنەوەیان خستە سەر ڕێڕەوەی زانستی نێو زنجیرەکە.

سەرەتای کارەکە بەجۆرێکە کە زیاتر لە کتێبێک دەخرێتە بەر دیدەی ئەو خوێندکارانەی بەشداریی زنجیرەی ڕۆشنبیریی خوێندکارانیان کردووە، دوای ئەوەی بە کۆدەنگی لەنێوان خۆیاندا یەک جۆر لە کتێب هەڵدەبژێرن و ماوەیەک دیاریی دەکەن بۆ خوێندنەوەی.

دوای ئەوەی نزیکەی 10 بۆ 15 ڕۆژ دەرفەت بە خوێندکارانی بەشداربووی زنجیرەکە درا بۆ خوێندنەوەی کتێبەکە، پاشان کۆبوونەوە و هەر خوێندکارێک لە گۆشەنیگای خۆیەوە خوێندنەوە و شیکردنەوەی بۆ ئەو کتێبە کرد کە لەو ماوەیەدا خوێندوویەتییەوە، ئەم بیرۆکەیە هەنگاوێکی گرنگە بۆ ئەوەی خوێندکارانی بەشداربوو بتوانن ئاستی ڕۆشنبیری و مەعفریفی خۆیان دەوڵەمەند بکەن و سوود لە ئەزموونی تێگەیشتنی یەکتر وەربگرن.

زنجیرەی ڕۆشنبیری کۆمەڵەی خوێندکارانی کوردستان تەنها لە هەولێر بەردەوامی نابێت و لە قەزای کۆیەش بە هەمان شێوە خوێندکارانی بەشداربووی ئەو شارە، درێژە بەو پرۆسەیە دەدەن.