بەشدارییکردن لە کۆنگرەی گشتیی لاوانی سۆشیاڵ دیموکرات لە مەغریب

کۆمەڵەی خوێندکارانی كوردستان بە بانگهێشتێکی ڕەسمی، بەشداریی لە کۆنگرەی گشتیی لاوانی سۆشیاڵ دیموکرات کرد کە لە رەباتی پایتەختی مەغریب بەڕێوەچوو و ماوەی پێنج ڕۆژی خایاند.

کۆنگرەکە بە بەشداریی نوێنەرانی دەوڵەتانی عەرەبی و نێودەوڵەتی بەڕێوەچوو، لە هەرێمی کوردستانیشەوە، نەسرین کەنعان و چێنەر فوئاد وەک نوێنەری کۆمەڵەی خوێندکارانی کوردستان بانگهێشتکرابوون کە تێیدا چەندین پانێڵ سازکران و پرسەکانی بەشداریی ژنان، کولتوور و گەشەپێدانی کۆمەڵایەتی گفتوگۆیان لەبارەوەکرا.

یەکێک لە پانێڵەکانی کۆنگرەکە تایبەت بوو بە پرسی ژن و بەشداریی لە بەڕێوەبردنی کۆمەڵگە، نەسرین کەنعان وەک نوێنەری کۆمەڵەی خوێندکاران و پانێڵیستێک، ئاماژەی بە پرسی ژنان لە کوردستان هەرێمی کوردستان کرد و باسی لەوەکرد، لەدوای ڕاپەڕینی ساڵی ١٩٩١، یەکێتیی نیشتمانیی کوردستان و کۆمەڵەی خوێندکارانی کوردستان پرسی پاراستنی مافی ژنان و دادپەروەریی کۆمەڵایەتییان وەک پرسێکی نیشتمانی لە ئەستۆ گرتووە و ڕۆڵی گرنگیان گێڕاوە لە گەشەپێدان و بەشداریپێکردنی ژنان لە ناوەندەکانی بڕیاردا، ئاماژەی بەوەشکرد، ئێستا لە هەرێمی کوردستان ژنان بەشداریی چالاکانەیان هەیە لە بەڕێوەبردنی وڵات و سێکتەرە جیاوازەکانی کۆمەڵگە، بۆ ئەمەش ڕۆڵی خاتوو هێرۆ ئیبراهیم ئەحمەد وەک سیمبولی ژنی بەهێز و خۆڕاگر کە خزمەتی گەورەی کوردستانی کردووە، هەروەها نوخشە ناسیح، پارێزگاری هەڵەبجە و رێواز فایەق، سەرۆکی پێشووی پەرلەمانی وەک نموونە هێنایەوە کە یەکەم ژن بوون ئەو پۆستە هەستیارە وەربگرن و کاریگەریی بەرچاویان هەبێت لە بڕیارە یەکلاکەرەوەکاندا،  چەندەها ژنی دیکەش کە ڕۆڵ و پێگەی گەورەیان هەیە لە کوردستان و یەکێتیدا.

پارێزگاریکردن لە کولتووری ناوچەکە و گەشەپێدانی، تەوەرێکی دیکەی قسەکانی نوێنەری کۆمەڵەی خوێندکاران بوو، لەو چوارچێوەیەشدا باسی لەوەکرد، ئێستا کچان و ژنانی کورد ڕۆڵێکی گرنگ دەگێڕن لە پاراستنی میراتی نەتەوەیی و دەوڵەمەندکردنی فەرهەنگ و کەلەپووری کورد و ژنان بەشێکی گرنگی چالاکییە کولتووری و نەتەوەییەکان پێکدەهێنن.

لەلایەکی دیکەوە نوێنەرانی کۆمەڵەی خوێندکارانی کوردستان دیدارێکی بەرهەمداریان لەگەڵ بەڕێز عیماد حسێن، باڵیۆزی عێراق لە مەغریب لەبارەی چالاکی و هەوڵەکانی کۆمەڵەی خوێندکاران بۆ خزمەتی رەوتی خوێندن و خوێندکاران ئەنجامدا و لەو بارەیەشەوە باڵیۆزی عێراق رایگەیاند، ستایشی هەوڵەکانتان دەکەین و هیوادارین لە داهاتوودا بتوانین لەڕێگەی کۆمەڵەی خوێندکارانەوە کاری گەورەتر بۆ خوێندکارانی کوردستان بکەین و بتوانین زەمالەی خوێندن لە زانکۆ گەورەکانی جیهان و دەوڵەتانی عەرەبی بۆ خوێندکاران وەربگرین.