پەیامی کۆمەڵەی خوێندکارانی کوردستان بۆ یۆبیلی زێڕینی یەکێتیی نیشتمانیی کوردستان

دەقی پەیامەکەی کۆمەڵەی خوێندکارانی کوردستان بۆ یۆبیلی زێڕین و یادی ٥٠ ساڵەی دامەزراندنی یەکێتیی نیشتمانیی کوردستان:

کۆمەڵەی خوێندکارانی کوردستان یۆبیلی زێڕینی یەکێتیی نیشتمانیی کوردستان و نیو سەدە خەبات لە پێناو سەربەرزیی و سەرفرازیی خەڵکی کوردستان پیرۆز دەکات.

٥٠  ساڵە یەکێتیی نیشتمانیی کوردستان پابەند بە بەها باڵا و پیرۆزەکانی، لەپێناو چەسپاندنی یەکسانی و  دادپەروەری خەبات دەکات و تاوەکو ئێستاش بەردەوامە. لەو چوارچێوەیەشدا کۆمەڵەی خوێندکارانی کوردستان کە لە هەناوی یەکێتی و لە سەختترین قۆناغی خەباتی کوردایەتیدا لەدایکبوو، هاوتای حزبەکە و بە هەمان رۆحییەتەوە درێژەی بە رەوتی خەبات داوە و هەمیشە وەک بەشێک لەو بزووتنەوە مێژووییە پابەندبووە بە بەدیهێنانی ئامانجە باڵاکان و هەنگاونان بەرەو داهاتوویەکی سەقامگیرتر بۆ خوێندکاران و گەنجانی کوردستان.     

کۆمەڵەی خوێندکارانی كوردستان جگەلەوەی بە شانازییەوە ئەم رۆژە مێژووییە بەرز رادەگرێت و سەروەرییەکانی رابردوو وەبیردەهێنێتەوە، هاوکات داواکارە لە داهاتوودا بە دیدگایەکی جیاوازتر و هەنگاوی فراوانترەوە کار بۆ خزمەتی خوێندکاران و رەوتی خوێندن بکرێت و بە تێگەیشتنی جیاوازترەوە مامەڵە لەگەڵ ئەم چینە گرنگەی کۆمەڵگە و ئەو سێکتەرە هەستیارە بکرێت. ئەوەی سەرۆک بافڵ جەلال تاڵەبانی لەچەندساڵی رابردوودا لەنزیکەوە گوێبیستی داوا و خواستی خوێندکارانی کوردستان بوو، هەنگاوێکی ئەرێنی و گەورەبوو بە ئاڕاستەی رەخساندنی ژینگەیەکی گونجاو و لەبار، بۆیە  ئێمە هیوادارین ئەو هەنگاوە کاریگەرانە درێژەیان هەبێت. چونکە هەموو وەبەرهێنانێک لە پرۆسەی خوێندن و خوێندکاراندا، وەبەرهێنانە لە داهاتووی کۆمەڵگە و بونیادنانی کۆمەڵگەیەکی بەهێزتر و پێشکەوتووتر. هەموو پشتیوانییەک لە خوێندکاران و هاوکاریکردنیان، پەروەردەکردنی نەوەیەکە کە دەتوانن لە داهاتوودا ببنە پێشەنگ و سەرکردایەتیی کۆمەڵگە بکەن، بە بیری نوێخواز و داهێنەرانەیانەوە وڵاتەکەمان بەرەو ئاسۆیەکی گەشتر ئاڕاستە بکەن و گۆڕانکاریی ئەرێنی بهێننە کایەوە.     
ئێمە دڵنیاین سەرۆک و سەرکردایەتیی یەکێتیی نیشتمانیی کوردستان لە هەمووکەس زیاتر درک بەم راستییانە دەکەن و هەنگاوەکانی داهاتوویان وەڵامدەرەوەی خواستە گرنگەکانی ئەمڕۆی خوێندکاران و گەنجان دەبن.