بیرۆکەی پرۆژەکانتان بنێرن و ببنە خاوەنی بزنس و کاری خۆتان

کۆمەڵەی خوێندکاران

چالاکی داهێنەرانی ئاییندە پرۆژەیەکی هاوبەشی کۆمەڵەی خوێندکارانی کوردستان و زانکۆی جیهان- سلێمانییە، لەم چالاکییەدا پرۆژەکەت لەسەر کاغەز و نووسینەوە وەردەگێڕدرێت بۆ کردار و کاری پێدەکرێت.

ئەم دەرفەتە بۆ خوێندکاران یان دەرچووانی زانکۆ و پەیمانگەکانی هەرێمی کوردستان و عێراقە، هەمووان دەتوانن بەبێ جیاوازیی سوودی لێ ببینن.

لەڕێگەی ئەم پرۆژە هاوبەشەی کۆمەڵەی خوێندکارانی کوردستان و زانکۆی جیهان- سلێمانییەوە، خوێندکار دەتوانێت دەرفەتی کار بقۆزێتەوە و ببێت بە خاوەنی بزنسی خۆی، جگەلەوەش ئەم پرۆژەیە تایبەت نییە بە تەنها شارێک، بەڵکو لە هەر شوێنێکی دەتوانیت پێشکەشی بکەیت.

لەلایەکی دیکەوە ئەم پرۆژەیە مینبەرێک دەبێت بۆ ئەوەی خوێندکار بتوانێت بەشداریی بازاڕی کاری کوردستان بکات، گفتوگۆ لەگەڵ خاوەنکار و وەبەرهێنەران بکات.

گرنگی ئەم چالاکییە لەلایەن خوێندکاران و ئەو لایانەنە دەبێت کە سپۆنسەری بیرۆکەکە دەکەن بۆ جێبەجێکردنی پرۆژەکە.

ئەو سێکتەرانەی دەتوانیت پرۆژەکەتی تێدا پێشکەش بکەیت بریتین لە:

*زانستە پزیشکییەکان

*ئەندازیاری

*کۆمپیوتەر و ژیریی دەستکرد

*زانستە کشتوکاڵییەکان

*گرافیک دیزاین  و میدیا

*زانستە کارگێڕی و مرۆییەکان

*هەر پرۆژەیەکی داهێنەرانەی دیکە

ئەم چالاکییە تاوەکو 25/5/2025 بەردەست دەبێت و بیرۆکەکان لەلایەن لیژنەی باڵای چالاکییەکەوە هەڵدەسەنگێندرێت.