بەشێک لە خوێندکارانی زانکۆی سلێمانی سوپاسی کۆمەڵەی خوێندکاران دەکەن

کۆمەڵەی خوێندکاران

ئەو خوێندکارانەی بەشداریی کۆرسی نووسین و بڵاوکردنەوەی توێژینەوەی زانستییان کردبوو ستایشی کۆمەڵەی خوێندکاران دەکەن.

لەماوەی ڕابردوودا کۆمەڵێک خوێندکاری بەشە جیاوازەکانی زانکۆی سلێمانی بەشدارییان لە کۆرسی هونەری نووسین و بڵاوکردنەوەی توێژینەوەی زانستی کۆمەڵەی خوێندکارانی کوردستان کردبوو، دواتر بڕوانامەیان پێبەخشرا، لەئێستادا ئەو خوێندکارانە ستایش و سوپاسی کۆمەڵەی خوێندکاران دەکەن بۆ ئەو هەنگاوە گرنگەی ناویەتی.

باوەڕ ئەسوەد ڕەسوڵ، خوێندکاری کۆلێجی پزیشکیی ڤێتێرنەری لە زانکۆی سلێمانییە و بۆ ماڵپەری کۆمەڵەی خوێندکاران دەڵێت "زۆر گرنگ بوو بۆ ئێمە بەشداریی لەم کۆرسەدا بکەین، کە بە سوپاسەوە لەلایەن کۆمەڵەی خوێندکارانی کوردستان و بە هاوکاری ستافی زانکۆ ئامادە کرابوو".

ئەو خوێندکارە ئاماژە بەوە دەکات کە لەو کۆرسەدا کۆمەڵێک خاڵی زۆر گرنگ لەلایەن بەشێك لە دکتۆر و مامۆستاکانی زانکۆوە تیشکی خرایە سەر، بەو هۆیەوە ئەو ئەزموونەی لە چەند ساڵی رابردوودا کۆیان کردبووەوە بەو خوێندکارانەیان بەخشی کە بەشداریی کۆرسی هونەری نووسین و بڵاوکردنەوەی توێژینەوەی زانستیان کردبوو.

هێشوو قادر خوێندکاری قۆناغی پێنجەمی کۆلێجی پزیشکیی ددانە و یەکێکی دیکەیە لەو خوێندکارانەی بەشداری ئەو کۆرسەی کردووە و دەڵێت "سوودم بینیوە لەم کۆرسە، چونکە لەلایەن مامۆستای بە ئەزموونەوە پێشکەشکراون، ئەمەش وایکردووە سوودی زۆری بە خوێندکاران گەیاندووە".

لەلایەکی دیکەوە شۆخان محەمەد کە خوێندکاری بەشی زانستی خۆراک و کۆنترۆڵی جۆرییە لە زانکۆی سلێمانی، بۆ ماڵپەری کۆمەڵەی خوێندکاران وتی: "سوودی زۆرم لە بەشداریکردن لەم کۆرسەدا بینیوە و چوار کۆرسم وەرگرتووە، بەجۆرێک سوودم بینیوە کە هەمی ئەوەم هەبێت بتوانم وەک ئەم دکتۆر و پرۆفیسۆرانەی زانکۆی سلێمانی توێژینەوەیەک بڵاوبکەمەوە لە سەکۆ جیهانییەکاندا".

ڕۆژان جەمال کە خوێندکاری کۆلێجی پزیشکیی ڤێتێرنەری زانکۆی سلێمانیە و یەکێکی دیکەیە لەو خوێندکارانە، ئاماژەی بەوە کرد کە سوودی زۆری لەم کۆرسە بینیوە، چونکە لەکاتی خۆیدا بووە، دەشڵێت ئەمساڵ کۆمەڵەی خوێندکاران چالاکی زۆر باشیان هەبووە و جگە لەم کۆرسە چەند کۆرسێکی دیکەشیان کردووەتەوە و خوێندکاران سوودی زۆریان لێ بینیوە.

 لە چەند ڕۆژی رابردوودا و لە ڕێوڕەسمێکی گەورەدا بە ئامادەبوونی پرۆفیسۆر د.کۆسار محەمەد عەلی، سەرۆکی زانکۆی سلێمانی و پ.ی.د.زانا مەحمود، یاریدەدەری سەرۆكی زانكۆ بۆ كاروباری زانستی و خوێندنی باڵا و پ.ی.د.شیروان حمە ساڵح، یاریدەدەری سەرۆكی زانكۆ بۆ كاروباری خوێندكاران، خەڵات بەخشرایە هەموو ئەو خوێندکارانەی بەشدارییان لە کۆرسی هونەری نووسین و بڵاوکردنەوەی توێژینەوەی زانستیدا کردبوو، لە ئێستاشدا ئەو خوێندکارانە سوپاسی کۆمەڵە دەکەن.

هەر لەو ڕێوڕەسمەدا پرۆفیسۆر د.کۆسار محەمەد عەلی، سەرۆکی زانکۆی سلێمانی، خەڵاتی ڕێزلێنانی بەخشییە كۆمەڵەی خوێندكارانی سلێمانی لەپای هاوكاری و هەماهەنگییان لەگەڵ سەنتەری توێژینەوەی زانكۆ بۆ كاری هاوبەش و خزمەتی خوێندكاران.