ستافی کۆمەڵەی خوێندکاران سەردانی جێگری سەرۆکی یەکێتیی نیشتمانیی کوردستانیان کرد

کۆمەڵەی خوێندکاران

ستافی کۆمەڵەی خوێندکارانی کوردستان سەردانی بەڕێز ڕەفعەت عەبدوڵڵا، جێگری سەرۆکی یەکێتیی نیشتمانیان کرد و بەشێوەیەکی وردودرشت باس لە کار و چالاکییەکانی کۆمەڵەی خوێندکاران کرا.

دەستپێکردنەوەی کۆمەڵەی خوێندکاران بەفۆڕمێکی جیاواز و سەردەمیانە، بووە یەکێک لە تەوەرەکانی باسوخواسی ئەو سەردانە، بەو هۆیەوە جێگری سەرۆکی یەکێتیی نیشتمانیی کوردستانیش تیشکی خستە سەر هەوڵەکانی کۆمەڵەی خوێندکاران بۆ خزمەتکردنی زیاتری خوێندکاران و ڕەوتی پەروەردە و خوێندنی باڵا، جگەلەوەش وەک شانازییەک ناوزەدی کرد.

 لە درێژەی گفتوگۆکانیدا ڕەفعەت عەبدوڵڵا باسی لەوە کرد کە پشتیوان و هاوکاری کارەکانی کۆمەڵەی خوێندکاران دەبێت، ئامانجی ئەوانیش فراوانترکردنی سنووری کارکردن و پرۆژەکانی کۆمەڵەی خوێندکارانە بۆ سەرجەم خوێندکارانی هەرێمی کوردستان.

جێگری سەرۆک لە بەشێکی دیکەی قسەکانیدا ئاماژەشی بەوە کرد سەربەخۆیی لە کارکردنی کۆمەڵەی خوێندکاران و دوورکەوتنەوە لە هەژموونی حزب، ڕووخسارێکی گەش و جیاوازی بە کۆمەڵەی خوێندکارانی کوردستان بەخشیوە و بەڕێزەوە لە ماندووبوونیان دەڕوانێت.

بەشێکی دیکەی ئەو سەردانە تایبەت بوو بە کار و پرۆژەکانی داهاتووی کۆمەڵەی خوێندکاران و گفتوگۆیان لەبارەوەکرا، ناوبراو هاوکاری و پشتیوانیی بۆ کارەکان دەربڕی و وتی: "ئامانجی ئێمە فراوانترکردنی سنووری کارکردن و پرۆژەکانتانە بۆ خزمەتی سەرجەم خوێندکاران لە هەرێمی کوردستان، بۆ ئەو مەبەستەش هاوکار و هەماهەنگ دەبین و دەمانەوێت ئەو ژینگە لەبارەی خوێندکاران دەیخوازن، ئێوە ڕەخسێنەری بن و بەدیهێنەری خواستەکانیان بن".