کۆمەڵەی خوێندکاران لە چین بەشداریی کۆنفرانسێکی نێودەوڵەتی دەکات

کۆمەڵەی خوێندکاران

کۆمەڵەی خوێندکارانی کوردستان دەچێتە چین و بەشدار دەبێت لە كۆنفرانسێكی نێودەوڵەتیدا، بە ئامانجی تاووتوێکردنی گۆڕانکارییەکانی جیهان تایبەت بە کەشوهەوا.

ئەو كۆنفرانسە نێودەوڵەتییەی لە چین سازدەکرێت، لەبارەی گواستنەوەی تەکنەلۆجیایە بۆ ڕووبەڕووبوونەوەی گۆڕانی کەشوهەوا لە جیهاندا، بۆ ئەو مەبەستە یەکێک لە لایەنە بەشدارەکان، کۆمەڵەی خوێندکارانی کوردستانە
كۆنفرانسەكە لەلایەن زانكۆی نانجینگ بۆ زانست و تەكنەلۆجیای زانیاری بەهاوكاریی كونسوڵخانەی كۆماری گەلی چین لە هەولێر رێكدەخرێت.

کۆنفرانسەکە تایبەتە بە چالاكییە پیشەییەكانی وڵاتانی تازەپێگەیشتوو بۆ گەڕان بەدوای ستراتیج و تەكنەلۆجیای داهێنەرانە، بۆ ڕووبەڕووبوونەوەی گۆڕانی كەشوهەوا کە تێیدا (وزەی پاك، تەكنەلۆجیای نوێبووەوە و بەڕێوەبردنی مەترسییەكانی گۆڕانی كەشوهەوا) تاووتوێ دەكرێن.

بەشداربوونی كۆمەڵەی خوێندكارانی كوردستان لەو كۆنفرانسە نێودەوڵەتییەی چین، جەختكردنەوەیە لە پابەندییەكانی بۆ هاوكاریی جیهانیی، گەشەپێدانی بەردەوام و بەهێزكردنی سەركردە گەنجەكان بۆ بەشداریكردن لە دەستپێشخەرییە نێودەوڵەتییەكان و پێگەیاندنی نەوەیەك كە توانای هێنانەكایەی گۆڕانكاریی ئەرێنی و سەركردایەتی لە كۆمەڵگەدا هەبێت.