کۆسرەت ڕەسوڵ: شانازییەکی گەورەیە تەمەنی ئەم ڕێکخراوە نزیک دەبێتەوە لە نیو سەدە

بەبۆنەی یادی 49 ساڵەی دامەزراندنی کۆمەڵەی خوێندکارانەوە، کۆسرەت ڕەسوڵ عەلی پەیامی پیرۆزبایی ئاڕاستە کرد، بە شانازییەکی گەورە ئەو ڕێکخراوەی ناوزەد کرد کە تەمەنی نزیک دەبێتەوە لە نیو سەدە.

(٤٩)هەمین ساڵیادی دامەزراندنی کۆمەڵەی خوێندکارانی کوردستان لە خۆتان و ئەندامان و لایەنگرانتان پیرۆز دەکەم، ئومێد دەکەم بەردەوام بن لە خزمەتکردنی زیاتری خوێندکاران و رەوتی پەروەردەو فێرکردن.

٤٩ ساڵ لەمەوبەر لە شاری کەرکووک لەگەڵ هەڤاڵانم (شەهید شوان، شەهید رەئوف عەقراوی، لەتیف شێخ عومەر، محەمەد خورشید) پێکەوە کۆمەڵەی خوێندکارانی کوردستانمان دامەزراندو ئامانجمان بوو لەپاڵ خەباتی چەکداری و بەرگری کردن لە کوردستان و خاکەکەی، لەرێگای کۆمەڵەی خوێندکارانی کوردستان لەنێو خوێندکاراندا کاربکەین بۆ سەرخستنی دۆزی رەوای گەلەکەمان و خزمەتکردنی خوێندکاران.

مایەی شانازییەکی گەورەیە کە ئەمڕۆ تەمەنی ئەم رێکخراوە نزیک دەبێتەوە لە نیو سەدە، بە بەردەوامی لەنێو خوێندکاران چالاکانە کاری کردووەو توانیویەتی خزمەتێکی یەکجار گەورە بە خوێندکارانی کوردستان بگەیەنێت و دەرفەتی پێگەیاندن و گەیشتن بە خەونەکانی بۆ رەخساندوون، پێویستە لە قۆناغەکانی داهاتووش لەپاڵ گۆڕانکارییەکانی ناوچەکەو پێشکەوتنە تەکنەلۆژییەکان بەخۆگونجاندن لەگەڵ سەردەم بە بەرنامەیەکی نوێوە کۆمەڵەی خوێندکارانی کوردستان خزمەتی خوێندکاران بکات و دیدگای روونی خۆی هەبێ بۆ کارکردن.

جارێکی تر پیرۆزبایی گەرمی خۆم ئاراستەی کۆمەڵەی خوێندکارانی کوردستان دەکەم و دروودو سڵاو دەنێرین بۆ گیانی پاکی شەهیدان بەگشتی و خوێندکارە شەهیدەکان بەتایبەتی.