پەیامی سەرۆکی یەکێتیی نیشتمانیی کوردستان بەبۆنەی ساڵیادی دامەزراندنی کۆمەڵەی خوێندکارانەوە

لەیادی 49ی ساڵەی دامەزراندنی کۆمەڵەی خوێندکارانی کوردستان، بافڵ جەلال تاڵەبانی سەرۆکی یەکێتیی نیشتمانیی کوردستان پەیامێکی پیرۆزبایی ئاڕاستەی کۆمەڵەی خوێندکاران کرد، خوێندکاران و گەنجانی بە سەرمایەیەکی بە بەها و بە نرخی گەلەکەمان ناوزەد کرد.

دەقی پەیامەکە...
لە 49ـەمین ساڵیادی دامەزراندنی کۆمەڵەی خوێندکارانی کوردستان، لە دڵەوە پیرۆزبایی لە هەموو ئەو گەنج و خوێندکارانە دەکەم کە بەهیواوە بۆ داهاتوویەکی گەش تێدەکۆشن و هەوڵدەدەن تاوەکو ببنە نەوەیەکی سوودبەخش بۆ پێشخستنی هەرێمەکەمان.

خوێندکاران و گەنجان سەرمایەیەکی بە بەها و بە نرخی گەلەکەمانن، دەتوانین بە پشتگیریکردنیان دەرفەتی زیاتریان بۆ بڕەخسێنین و بەشداربن لە گەشەپێدانی زیاتری وڵاتەکەمان.

ئێمە هەمیشە بەدیدگایەکی نوێوە لە رۆڵی خوێندکاران و گەنجەکانمان دەڕوانین و باوەڕمان بە توانا و لێهاتوویی و کارامەییان هەیە، هەوڵەکانیشمان بۆ هێنانە پێشەوەیان لە تەواوی کایەکاندا بەشێکە لە ستراتیجی کارکردنمان.

لە ئەمڕۆشدا دووپاتیدەکەمەوە کە خەمخۆری پێشخستنی کەرتی پەروەردە و خوێندنی باڵا دەبین تاوەکو هەموومان پێکەوە سیستمێک بنیادبنێین کە گەنجەکانمان بە ئومێدەوە بۆ داهاتوویەکی گەش هەوڵبدەن.

بافڵ جەلال تاڵەبانی
سەرۆکی یەکێتیی نیشتمانیی کوردستان