کۆمەڵەی خوێندکاران و زانکۆی ڕاپەڕین لە کەرنەڤاڵێکدا دەیان هەزار کەسیان کۆکردەوە

ڕۆژی 17ی نیسان کۆمەڵەی خوێندکارانی کوردستان و زانکۆی ڕاپەڕین، کەرنەڤاڵێکی گەورەیان بۆ خەڵكی دەڤەری پشدەر و بیتوێن سازکرد، بەو بۆنەیەوە یادی ڕاپەڕینیان بەرز نرخاند و چەند چالاکییەکی گەورەیان ئەنجامدا.

لەو کەرنەڤاڵەدا زیاتر لە 200 ناوەند و کۆمپانیا لە ڕانیە بەشداریان کرد و بە چەند چالاکییەکی هەمەچەشن و جۆراوجۆر ئامێزیان بۆ خەڵکی ئەو دەڤەرە کردەوە، هەربۆیە کۆبوونەوەیەکی گەورەی جەماوەری بووە داینەمۆی پێشوازیکردنی ئەو کەرنەڤاڵە گەورەیەی کۆمەڵەی خوێندکاران و زانکۆی ڕاپەڕین سازیان کردبوو، لەو سەروبەندەدا دەیان هەزار کەس ئامادەی بوون.

کەرنەڤاڵەکە لە کاتژمێر 10ی سەرلەبەیانی ڕۆژی چوارشەممەوە لە کەمپی نوێی زانکۆی ڕانیە دەستی پێکرد و تیایدا زۆرێک لە خوێندکارەکان بەشداریان تێدا کرد، دڵخۆشی خۆیان بە وەها کەرنەڤاڵێکی گەورە نیشان دا و بەشدارییان لە چالاکیە جۆراوجۆرەکانیدا کرد.

کەرنەڤاڵە گەورەکەی دەڤەری ڕاپەڕین زۆرتر لە چوارچێوەیەکی کلتووری و زانستیدا خۆی نمایش کرد، ئامانجی گەشەکردنی ئەو سێکتەرە گرنگانەبوو بۆ خوێندکارانی دەڤەری ڕاپەڕین و دەروازەی ڕاپەڕین بەتایبەتی و هەموو شار و شارۆچکەکانی کوردستان بەگشتی.

کۆمەڵەی خوێندکاران هەمیشە پشتیوان و پشتگیری خوێندکارانە و لەگەڵ ئەو کەرنەڤاڵەدا بەڵێنی ئەوەی دووپاتکردەوە کە چالاکی و کاری گەورەتر بەڕێوەیە بۆ خوێندکاران، هەربۆیە دەبێتە هیوا و ئومێد لە سەرجەم بۆنە و کارە زانستیەکاندا.

ساڵانە یادی ڕاپەڕین لە 5ی ئادار ئەنجام دەدرێت، چونکە یەکەم چەخماخەی دەرپەڕاندنی ڕژێمی بەعسی ڕووخاو لەو ڕۆژەدا بووە و خەڵكی بە جەسارەتی ڕانیە و ناوچەکانی دەوروبەری ئەنجامیانداوە، بەڵام لەبەرئەوەی ئەو رۆژە کەوتە مانگی پیرۆزی ڕەمەزانەوە، کەرنەڤاڵە هاوبەشەکەی کۆمەڵەی خوێندکاران و زانکۆی ڕاپەڕین بۆ 17ی نیسان دواخرا.