نوێنەرانی خوێندکاران سەردانی مانگرتووانیان کرد

نوێنەرانی خوێندکارانی زانکۆی سلێمانی و نوێنەری خوێندكارانی زانکۆی پۆلیتەکنیکی سلێمانی، سەردانی خێوەتگەی مانگرتووانیان کرد.

ئەمڕۆ سێشەممە ڕێکەوتی ٤ی شوبات، لە سۆنگەی بەرپرسیارێتی و خەمخواردن بۆ هەموو چین و توێژەکانی کۆمەڵگەکەمان، نوێنەرانی خوێندکارانی زانکۆی سلێمانی و زانکۆی پۆلیتەکنیکی سلێمانی، سەردانی خێوەتگەی مانگرتووانیان کرد.

نوێنەرانی ئەو خوێندکارانە مەبەستیانە ئەو پردی پەیوەندییە بەپتەوی بهێڵنەوە کە هەمیشە لەگەڵ مامۆستایان و فەرمانبەراندا دروستیان کردووە. نوێنەرانی خوێندکارانی زانکۆی سلێمانی و زانکۆی پۆلیتەکنیکی سلێمانی، ئامانجیانە مامۆستایان و فەرمانبەران مافە ڕەواکانی خۆیان وەچنگ بخەن و لە بەرانبەریشدا مافی هەموو خوێندکارێک پارێزراوبێت و بێبەش نەبن لە عیلم و عیرفانی نێو هۆڵەکانی خوێندن.

لەکۆتاییدا هەردوولایان پێداگربوون لەسەرئەوەی هەموو ئاستەنگ و لەمپەرەکانی نێو کۆمەڵگەکەمان بە هەماهەنگی هەموولایەک چارە بکرێت.