سەرۆک بافڵ: لە دڵەوە پیرۆزبایی لە سەرۆک، مامۆستایان، کارمەندان و خوێندکارانی زانکۆی دایک دەکەم

بافڵ جەلال تاڵەبانی سەرکەوتنە مێژووییەکەی زانکۆی سلێمانی بە مایەی خۆشحاڵیی گەورە دەزانێت و بە ئەرکی هەموومانی دەبینێت پشتگیریی سەرجەم زانکۆکانی هەرێم کوردستان بکەین.

سەرۆک بافڵ جەلال تاڵەبانی سەرپەرشتیاری کۆمەڵەی خوێندکارانی کوردستان، لە پەیامێکدا پیرۆزبایی ئاراستەی زانکۆی سلێمانی دەکات بەبۆنەی بەدەستهێنانی پلەی یەکەم لەسەر ئاستی زانکۆکانی عیراق و هەرێمی کوردستان لە ریزبەندیی زانکۆکانی جیهاندا، دەشڵێت "ئەرکی هەموومانە پشتگیریی سەرجەم زانکۆکانی هەرێم بکەین".

سەرۆک بافڵ جەلال تاڵەبانی راشیگەیاندووە کە سەرکەوتنە مێژووییەکەی زانکۆی سلێمانی بۆ بەدەستهێنانی پلەی یەکەم لەسەر ئاستی زانکۆکانی عیراق و هەرێمی کوردستان لە ریزبەندیی زانکۆکانی جیهاندا، مایەی خۆشحاڵییەکی گەورەیە و لە دڵەوە پیرۆزبایی لە سەرۆک، مامۆستایان، کارمەندان و خوێندکارانی زانکۆی دایک دەکەم".

هەروەها دەڵێت ئەرکی هەموومانە پشتگیریی سەرجەم زانکۆکانی هەرێمی کوردستان بکەین تاوەکو بگەنە ئاستێکی باڵاتر و بەدەستهێنانی پلەی بەرزتر، ئێمە پاڵپشتیی تەواوی مامۆستا بەڕێز و خوێندکارە خۆشەویستەکان دەکەین لە هەر زانکۆیەکی کوردستاندا بێت تاوەکو پێکەوە پرۆسەی خوێندن و زانست بگەیەنینە ئاستی زانکۆ جیهانییەکان و مێژوویەکی پڕ لە شانازی بۆ کوردستانەکەمان بنووسینەوە.

سەرۆک بافڵ جەلال تاڵەبانی لە پەیامەکەیدا ئاماژەی بەوەشکردوە هەوڵەکانمان لە رابردوودا بۆ خزمەتی خوێندکاران و بەرەوپێشچوونی رەوتی خوێندن، هەنگاوێکی گرنگبوو بە ئاڕاستەی رەخساندنی ژینگەیەکی لەبار و بەدیهێنانی خواستەکانی خوێندکارە خۆشەویستەکانمان، دڵنیاشتان دەکەین لە داهاتووشدا بەهەمان رۆحییەتەوە لەخزمەتتاندا دەبین.