سیمیناری پرۆژەی نێکست ستێپ لە زانکۆی گۆیژە بەڕێوەچوو

بەسەرپەرشتی قوباد تاڵەبانی، جێگری سەرۆکی حکومەتی هەرێمی کوردستان و بەهاوبەشی کۆمەڵەی خوێندکارانی کوردستان و وەزارەتی خوێندنی باڵا و توێژینەوەی زانستی، ئەمساڵ پرۆژەی نێکست ستێپ بۆ دەرچووانی پۆلی 12 بەڕێوەدەچێت.

ڕۆژی شەممە سیمینارێک لە زانکۆی گۆیژە بۆ پرۆژەی نێکست ستێپ بەڕێوەچوو، تێیدا زۆرێک لە بەڕێوەبەر و یاریدەدەر و مامۆستایانی خوێندنگەکانی سلێمانی بەشدارییان کرد، بۆ ئەو مەبەستە پێشانگەیەکی گەورە دەکرێتەوە بە ئامانجی خزمەتی زیاتر بە دەرچووانی پۆلی 12.

بۆ چوارەمین ساڵی لەسەریەکە نێکست ستێپ لەدوای ئەنجامی تاقیکردنەوەکانی خولی یەکەم و دووەمی پۆلی 12 بەڕێوەدەچێت، بۆ ئەمساڵیش لەکارگەی کولتووری سلێمانی لە ڕۆژنی 19 – 20 -21ی ئەم مانگە بە نوێنەرایەتی زانکۆ و پەیمانگە حکومی و ناحکومییەکانی هەرێمی کوردستان پێشانگەی نێکست ستێپ بەڕێوەدەچێت.

نێکست ستێپ بەرچاڕوونی و فێرکردنی خوێندکارانە بۆ پڕکردنەوەی فۆڕمی زانکۆلاین بەپێی نمرە و خواستی خۆیان، تاوەکو دەرچووانی پۆلی 12 بتوانن بەگوێرەی نمرەکانیان لە زانکۆ و پەیمانگەکان بۆ ساڵی خوێندنی 2026-2027 بخوێنن.