میوانەکانمان یۆبیلی 50 ساڵەی کۆمەڵەی خوێندکارانی کوردستانیان زێڕینتر کرد

مەراسیمی یۆبیلی زێڕینی یادی 50 ساڵەی کۆمەڵەی خوێندکارانی کوردستان کۆتاییهات، لەو نێوانەدا هاتنی میوانەکان چەخماخەی پاڵپشتی و پشتگیرییەکی زۆرتر بوو لە نێو هۆڵی بەڕێوەچوونی یادەکەدا لێ درا و جەخت لە بەردەوامبوونی کارەکانی کۆمەڵەی خوێندکاران بەشێوەی باشتر و زانستی تر کرایەوە.

لە 26ی نیسانی 2026 زۆرێك لە بەرپرسانی حزبی و حکومی و باڵیۆز و ئەندامانی مەکتەبی سیاسی یەكێتیی نیشتمانیی کوردستان و ئەندامانی پەرلەمان و مامۆستایانی زانکۆ و پەیمانگەکان بانگهێشتنی مەراسیمی یۆبیلی زێڕینی یادی 50 ساڵەی کۆمەڵەی خوێندکارانی کوردستان کران، ئەوان لەگەڵ هەموواندا یادی نیو سەدە لە خەباتی چەک و قەڵەمیان لە کۆمەڵگەی کوردەواریدا کردەوە.

لەنێو یادی 50 ساڵەی دامەزراندنی کۆمەڵەی خوێندکارانی کوردستان سەرجەم ئەو چالاکی و پرۆژانە نیشانی ئامادەبوان و میوانان دران کە لەدوای دوو ساڵ لە نوێبوونەوە بە فۆڕمێکی جیاواز، کۆمەڵەی خوێندکارانی کوردستان پێشکەشی خوێندکارانی کردووە.

لەلایەکی دیکەوە بەڵێنی چەندین پرۆژە و هەلی زیاتری پێشکەوتن بە خوێندکاران لە یۆبیلی زێڕینی 50 ساڵە درا، بە ئەمەکەوە کۆمەڵەی خوێندکارانی کوردستان ئەو بەرپرسیارێتییانەی لەسەر شانیەتی بەرانبەر خوێندکار و سەرجەم سێکتەرەکانی خوێندن لە هەرێمی کوردستان، جێبەجێیان دەکات.