کۆمەڵەی خوێندکاران پێشوازیی لە ڕێکخستنە دێرینەکانی یەکێتیی نیشتمانیی کوردستان کرد

لەبینای سەرەکی خۆیدا، کۆمەڵەی خوێندکارانی کوردستان پێشوازیی لە کۆمەڵەی ڕێکخستنە دێرینەکانی یەکێتیی نیشتمانیی کوردستان کرد، کە تیایدا گەنگەشە و بیروڕا گۆڕینەوە تەوەری سەرەکی سەردانەکە بوو.

کارا عومەر لێپرسراوی بەشی هەماهەنگی و بەدواداچوونی کۆمەڵەی خوێندکاران ئاماژەی بەوە کرد کە میوانداریی و پێشوازییان لە بەشێک لە ستافی کۆمەڵەی ڕێکخستنە دێرینەکانی یەکێتی کردووە، لەمیانی کۆبوونەوەیاندا باسیان لە چەند پرسێکی گرنگی خوێندکاران و گەنجان کردووە.

لەلایەکی دیکەوە ناوبراو دەڵێت " لە کۆبوونەوەکەیاندا گفتوگۆیان دەربارەی چالاکییە ئەکادیمی و زانستییەکانی کۆمەڵەی خوێندکاران بۆ خزمەتی ڕەوتی پەروەردە و زانست لە هەرێمی کوردستان کردووە".

لەمیانی سەردانەکەیاندا عوسمان عەبدوڵڵا، جێگری سەرۆکی کۆمەڵەی ڕێکخستنە دێرینەکانی یەکێتی سوپاس و ستایشی سەرۆکی یەکێتیی نیشتمانیی کوردستانی کرد کە جارێکی دیکە کۆمەڵەی خوێندکارانی کوردستانی هێنایەوە سەر کار، کۆمەڵێک کچ و کوڕی گەنجی هێنایە سەر مەیدانی سیاسی، کۆمەڵایەتی و ڕۆشنبیری.

لە بەشێکی دیکەی قسەکانیدا، جێگری سەرۆکی کۆمەڵەی ڕێکخستنە دێرینەکانی یەکێتی هیوای داهاتوویەکی پڕخێر و سەرکەوتوویی بۆ کۆمەڵەی خوێندکاران خواست.

بەکر محەمەدی سەرپەرشتیار و مامۆستای خانەنشینیش لە لێدوانێکیدا بۆ ماڵپەری کۆمەڵەی خوێندکارانی کوردستان وتی: "پێویستە سەرۆکی یەکێتیی نیشتمانیی کوردستان بەرز بنرخێنن، چونکە بووەتە پاڵنەرێکی باش بۆ خزمەتکردن بەو تیمەی کە دەیانەوێت خزمەت بە توێژی خوێندکاران بکەن".