لە گەرمیان سیمینارە گەورەکە بۆ خوێندکارانی پۆلی 12 ئەنجامدرا

کۆمەڵەی خوێندکارانی کوردستان لە کەلار سیمینارێکی گەورەی لە چوارچێوەی دیدی پەروەردە بۆ خوێندکارانی پۆلی 12 ئەنجام دا، بۆ ئەو مەبەستە ژمارەیەکی بەرچاو لە خوێندکار بەشدارییان تێدا کرد.

ڕۆژی 31/8/2025 بازنەی گەرمیانی کۆمەڵەی خوێندکارانی کوردستان لە شاری کەلار ئیڤێنتی دیدی پەروەردەی لەژێر ناونیشانی (هەنگاوەکانی سەرکەوتن و گەیشتن بە ئامانج)ی بۆ خوێندکارانی پۆلی 12ی ئەو دەڤەرە ساز و ئامادەکرد.

لەو ئیڤێنتەدا دوو مامۆستا و خوێندکارێکی بە ئەزموون بەشدارییان کرد و خوێندکارانیش بە پەرۆشەوە لەنێو هۆڵەکەدا گوێبیستی ئەزموون و سەرنجەکانی ئەو مامۆستایانە بوون، لە کۆتایی ئیڤێنتەکەشدا خەڵاتی کۆمەڵەی خوێندکارانیان وەرگرت.

یەکێک لەو مامۆستایانە (د.کەریم ئەحمەد عەزیز)ەو پسپۆڕی ڕێگاکانی وانەوتنەوەیە، لەژێر ناونیشانی "چۆن خۆم ئامادەبکەم بۆ تاقیکردنەوەکان؟" وتە و ئامۆژگاری بە نرخی بۆ خوێندکارانی بەشداربوو کردە دیاریی سیمینارەکە.

لەلایەکی دیکەوە (مامۆستا ئامانج محەمەد نەجم) کە ڕاهێنەری پەروەردەییە بەشێک لە سیمینارەکەی لە ئەستۆگرت و لەژێر ناونیشانی (چۆن کۆشش بکەم؟)، خاڵە بەهێزەکانی بۆ خوێندکارانی پۆلی 12 دەستنیشان کرد.

کۆتا قسەکەی نێو ئیڤێنتی دیدی پەروەردە، (بیلال عەبدوڵڵا محەمەد) بوو، ناوبراو شارەزای پۆلی دوازدەیە و ناونیشانی (چۆن بەردەوامبم؟)ی هەڵبژارد، بۆ ئەوەی لەڕێگەیەوە هانی خوێندکاران بدات بەردەوام بن تاوەکو لەم قۆناغە هەستیارەی خوێندندا کاری گەورە بکەن و ئامانجی دڵخوازی خۆیان بپێکن.

جگە لەو مامۆستایانەی خەڵاتیان وەرگرت، سێ خوێندکاری بازنەی گەرمیانیش بەهۆی ئاستە بەرزەکەیان و بەدەستهێنانی کۆنمرەی بەرز لەتاقیکردنەوەکانی پۆلی 12، خەڵاتی ڕێزلێنانی کۆمەڵەی خوێندکارانیان وەرگرت کە پێکدێن لە:

1-ڕۆژین فوئاد مەجید  (یەکەمی وێژەیی لەسەر ئاستی گەرمیان).

2-سۆزی فەرەیدون حەمید (دووەمی زانستی لەسەر ئاستی گەرمیان).

3-دییە کاروان میرزا (چوارەمی زانستی لەسەر ئاستی گەرمیان).

لە کۆتایی ئیڤێنتەکەدا کۆمەڵەی خوێندکارانی کوردستان بەڵێنی بە خوێندکارانی گەرمیان دا، لە داهاتوودا خزمەتی زیاتریان پێشکەش بکات.